Dili, 29 Marsu 2023
Kuarta feira semana ne’e, (29/03/2023) Liu hosi plenaria, Tribunal Rekursu anunsia ona rezultadu númeru sorteiu hosi kada partidu politiku sira, ba númeru ordenasaun konkorentes Eleisaun Parlamentar 2023.
Ordenasaun bá númeru sorteiu partidu polítiku sira sei aprezenta mos emblema ka sigla partidu nian bá Sekretariadu Tékniku Administrasaun Eleitorál (STAE) atu bele ajusta iha buletin votu.
Emblema sira ne’e, STAE sei lori mai Comissão Nacional de Eleições hodi hetan aprovasaun, hamutuk ho reprezentante partidu politiku sira molok lori bá gráfika Imprénsa Nasional Timor-Leste (INTL), nune’e bele halo produsaun bá buletin votu sira.
Haktuir ba Lei Eleisaun Parlamentár, 9/2017 artigu 39 hateten katak, sigla Bandeira ka emblema sira ne’e tenke hanesan ho sigla Bandeira ka emblema sira ne’ebé mak partidu ida-idak lori bá iha prosesu inskrisaun hanesan partidu politíku.
Enkuantu iha kinta feira 30 marsu 2023 STAE sei lori tinta indelivel ba CNE, prezensa mos hosi reprezentante partidu politiku sira atu halo aprovasaun.
Prezidente CNE, Dr. José Agostinho Belo husu bá partidu politiku sira atu kolabora diak ho órgaun eleitóral rua hanesan STAE ho CNE para bele fo garantias ba susesu Eleisaun Parlamentar ne’e.
“Partidu konkorente sira tenke koolabora no servisu diak nafatin ho órgaun rua, tanba Tribunál nia servisu provisoriamente, para iha ne’e no bainhira rezultadu eleisaun nian ne’ebé CNE halo apuramentu konklui, mak sei remete bá Tribunál hodi anunsiu no fo nia validasaun ba rezultadu sira.
