Dili, 23 Marsu 2023
Organizasaun Ema ho Difiisiensias Ra’es Hadomi Timor Oan, Kinta feira semana ne’e organiza Workshop ida, ne’ebe partisipa hosi Dirijentes Kargus Xefias Orgaun Eleitoral nian hanesan CNE no STAE inklui estudantes balu hodi koalia kona-ba direitu ema ho difisiensias iha vida polítika no hetan asesibilidade iha eleisaun Parlamentu tinan ne’e.
Workshop ne’e realiza tanba servisu hamutuk entre RHTO hoInternational Foundation for Electoral Systems (IFES) ne’ebe hetan apoiu hosi USAID.
Materia hirak ne’ebe fasilitador sira hosi RHTO aprezenta maka hanesan; Instrumentu Internasional Direitu Humanu nian sira no Partisipasaun Eleitoral ka Polítika hosi ema ho Difisiensia sira; Mitos no Estereòstipu sira kona-ba Ema ho Difisiensia sira; no Materia ikus mak kona-ba Rezultadu Missaun Monitorizasaun ba Asesu Difisiensia iha Eleisaun Presidente 2022.
Organizasaun ne’ebe defende DIreitu ema ho Difisiensia Timor Leste ne’e iha esperansa katak, Eleisaun Parlamentár 2023 mai, ema hotu, inklui ema ho defisiénsia iha direitu ne’ebé hanesan atu partisipa iha eleisaun bele iha asesibilidade, nune’e garante direitu dignu ba eleitor hotu hanesan.
Programa ne’ebe realiza iha salaun Apuramentu Nasional ne’e, ofisialmente abertura hosi Presidente CNE, Dr. Jose Belo. Workshop ne’e halo mos simulasaun kona-ba oinsa ema ho difisientes partisipa iha votasaun maibe laiha asessibilidade.
