Dili, 30 Marsu 2023
Hafoin de prezide Plenaria Extraordinária, hodi aprova Tinta Indilivel Eleisaun Parlamentar 2023 nian, iha parte lorokraik, tuku 17:30 Dr. Jose Belo hamutuk kometivas marka kedas audensia ho Nuncio Apostólico Santa Sé iha Timor Leste, Arcebispo Mgr. Marco Sprizzi, iha rezidensia Santa Sé Motael Dili.
Sorumutuk CNE ho Arcebispo ne’e hodi koalia kona-ba preparasaun CNE nian nudar Orgaun Supervizor Eleitoral, ne’ebe iha responsabilidade atu bele garante eleisaun ida livre, justu, sekretu, partisipativu no hakmatek. Iha biban hanesan CNE disponibiliza mgr. Marco Sprizzi atu bele sai nudar Orador iha Konferensia Internasional ne’ebe CNE sei realiza iha fulan Abril tinan ne’e.
CNE hamutuk ho Igreja Katólika sei realiza missa jeral ba Eleisaun Parlamentar 2023 ida ne’ebe hakmatek no sucesso, hodi involve kamada sosiedade tomak iha Timor Leste. CNE mos aproxima ona ho autoridade Igreja Protestante, Komunidade Muzulmanu atu bele kontribui liu hosi orasaun tuir fiar kada reliziaun nian, atu kumprimenta mos ba issu Fraternidade Humana.
