Dili, 6 Marsu 2023
Diplomata Thailandes, Mr. Ekapol Poolpipat tersa feira ne’e, 06/03/2023 tuku 10:00, marka prezensa iha edifisiu CNE, avenida 20 de Maio Colmera Dili, hodi halo audensia ho Prezidente CNE, Dr. Jose A. Belo
Wainhira dada lia ho Lider Máximu CNE, Embaxador ne’e hetete katak Timor Leste nudar nasaun ida ne’ebe moris hosi post-konflitu. Timor Leste hahu lolos nia istoria ne’ebe demokrátiku iha 1999 wainhira deside demokrátikamente nudar nasaun soberanu liuhosi Referendum ka Konsulta Popular mak organiza hosi Nasoens Unidas. Ho urgullu nia hatete.
Nia hatutan katak observasaun durante ne’e, Orgaun Eleitoral sira hanesan CNE no STAE hatudu profesionalismu ne’ebe kualifikadu hodi bele garante eleisaun ida Pasífiku, Demokrátiku, Sekretu no garante mos partisipasaun máximu hosi eleitor sira., maske votasaun laos obrigatoriu.
Dr. Jose Belo mos hatete katak hosi Profesionalismu ne’ebe orgaun eleitoral sira hatudu mak rejulta demokrasia Timor Leste nian okupa iha pozisaun ida ne’ebe diak teb-tebes iha nivel mundial, haktuir ba peskiza ne’ebe internasional sira apresia no fo valorizasaun ba ezistensia demokrasia Timor Leste.
Iha esperiensia sira liu ba, CNE Timor Leste sempre iha koperasaun ida ne’ebe forte ho nasaun Thailanda liga ho prosesu eleitoral nian, hanesan partisipa iha Missaun Observasaun Eleitoral iha Thailanda, nune’e mos observadores hosi Thailanda nian sai mos nudar observador ba eleisaun sira liu ba, mak organiza hosi ANFREL (Asia Network for Free Elections) no ADN (Asia Democracy Network)
Sorumutuk autoridade rua ne’e lao durante oras ida resin.
