Dili, 5 Marsu 2023
Comissão Nacional de Eleições nudar Orgaun Eleitoral Supervizor hamriik hosi baze Konstituisaun RDTL art. 65. 6 no Lei nù. 5/2006 ho nia alterasaun datoluk lei nù.16/2021 Orgaun Administrasaun Eleitoral nian.
Iha loron sabádu, 4 marsu 2023, Prezidente CNE Dr. Jose Belo hamutuk ho kometivas no tékniku sira marka prezensa iha Salaun “Casa de Retiro Maubara Fatubessi”, Munisipiu Liquisa hodi fasilita materia formasaun hirak hanesan “Ilisítiu Eleitoral (Krime Eleitoral), Prosedimentu Kampaña Eleitoral no Papel Fiskais Eleitorais”.
Partidu Polítikus nudar parseiru permanente Orgaun Eleitoral CNE. Prezensa CNE nian ne’e atu ajuda hasa’e koñesimentu Formantes oinsa bele kompriende papel lolos hosi Fiskais ne’e rasik.
Programa formasaun ida ne’e nudar preparativus hosi partidu Fretilin ba nia Formadores Fiskais Eleitoral sira mak sei hatutan sira nia formasaun ba Fiskais seluk ne’ebe futurumente sei destaka iha kada Sentru Votasaun no Estasaun Votu sira durante periodu eleitoral hodi halo fiskalizasaun ba prosesu operasaun eleitoral hahu kedas iha loron Votasaun, prosesu Kontajen inisial, prosesu Apuramentu Munisipal no Apuramentu Nasional, iha eleisaun Parlamentar 2023.
Formandu sira ne’ebe partisipa iha programa formasaun ne’e mai hosi Munisipiu Dili, Baucau, Manufahi no Liquisa. Tuir planu formasaun refere sei realiza mos ba formadores fiskais hosi munisipiu sira seluk iha semana tuir mai.
