Dili, 30 Marsu 2023
Comissão Nacional de Eleições, liu hosi Plenaria Extraordinaria 30 Marsu 2023, tuku 15:30 ho akta nú.6/CNE/III/2023, ne’ebe prezide hosi prezidente CNE, Dr. Jose A. Belo halo ona aprovasaun ba Espesifikasaun Tinta Indelevel Eleisaun Parlamentar 2023, ne’ebe aprezenta hosi Sekretariadu Tékniku Admnistrasaun Eleitoral (STAE) no hetan apoiu hosi Programa Nasoens Unidas ba Dezenvolvimentu (PNUD) iha Timor Leste.
Plenaria ne’e prienxe mos kuorum hosi Vice Prezidente CNE, Sekretaria CNE no membru komisariu sira. Alende ne’e marka mos iha fatin, reprezentantes partidu polítikus konkorentes Eleisaun Parlamentar 2023 nian, Autoridade Seguransa PNTL no seluk tan.
Iha teste ba kualidade Tinta Indelevel Eleisaun ne’e, perante reprezentantes Partidu Polítikus, PNUD utiliza material lubuk hanesan Sabaun, Alkohol, Gazolina, Bayclin no seluk tan.
Tinta Indelevel refere ho nia kontiudu no konsentrasaun Nitratu Prata (Sylver Nitrate) 25%, tuir akordu estandarte Internasional ICP-OES ka GB/T670.
Tinta ne’e presiza minutu 3 nia laran atu bele maran iha liman, hafoin eleitor ida vota hotu sei utiliza tinta refere, durasaun tempu mínimu oras 72 no máximu to’o fulan ida. Antes ne’e CNE – STAE – UNDP halo uluk teste iha loron 1 fulan marsu tinan ne’e, teste ida ohin nudar teste konfirmasaun perante partidu polítikus no kobertura mídia sira hodi hetan aprovasaun hosi CNE, ho asinatura hosi Partidu Polítiku sira.
Tinta ne’e rasik sei to’o iha Timor Leste, iha fulan ida antes loron votasaun nian.
