Ko’a Kek- Vise Presidente PN(kuana), Presidente CNE klaran no Xefi estadu maijor F-FDTL Interinu koronel Falur Rate Laek(karuk).Foto: Deolindo Ramos
Komemorasaun Dies Natalis CNE-nian ba Dahaat

Iha loron 17 fulan fevereiru 2011, CNE selebra ninia Dies Natalis ba dahaat iha salaun auditoriu foun CNE-nian iha Caicoli. Aproveita mos tempu oportunu ne’e hodi organiza seminariu ho tema”Balansu no Projesaun ba Eleisaun 2012.

“CNE ida ne’e konstituida iha 15 de Janeiru 2007. Maibe, iha altura ne’ebá, ami deside no adia tiha hodi foin komemora loron ohin(17), ho Konsiderasaun tanbá membru

PN no membru Governu sira sei okupadu ho debate orsamentu jeral do estadu, hateten Presidente CNE iha nia palavra de boas vindas.

Entretantu presidente CNE Faustino Cardoso Gomes informa katak dies natalis CNE-nian ne’e tempu oportunu tebes, tanba liu hosi aktividade ida ne’e bele partilla ba malu kestaun sira kona-ba eleisaun, aktualizasaun baze dadus, preparasaun ba eleisaun 2012, no oinsa atu asegura diak liu tan eleitor sira nia direitu de voto, bele asegura kredebilidade no transparensia ba prosesu eleitoral. Ho hanoin hirak ne’e maka iha dies natalis CNE-nian ba dahaat ne’e, halo mos seminariu ida ho tema Balansu no Projesaun ba Eleisaun 2012.

Iha tempu hanesan CNE mos lansa nia Buletin ho Naran Roman Eleitoral hosi Vise Presidente PN, Vicente Guterres.”objetivu hosi lansamentu buletin ne’e maka atu bele divulga no desimina informasaun ba ita-nia alvu em jeral, no espesialmente ba eleitor hotu ne’ebé maka tuir ami-nia haré presiza duni informasaun kona-ba lalaok eleisaun”, dehan Komisariu Lucas iha ninia aprezentasaun.

“Buletin ne’e ami hanaran Roman Eleitoral. Roman ne’e siknifika naroman ne’ebé maka leno Komisariu sira atu bele servisu tuir lema CNE-nian servisu ho transparente no imparsialidade, no mos bele leno eleitor sira iha área rural atu hatene kona-ba lala’ok eleisaun. Liu hosi buletin ne’e ami mos sei transmiti informasaun ba orgaun soberanu sira, tanbá dala barak sira-mos lahatene konabá ami nia kna’ar no sira dehan komisariu sira so servisu deit iha tempu eleisaun”, lamenta komisariu ne’ebé kaer kna’ar nudar koordenador sub-komisaun relasaun públika.

Iha komemorasaun dies natalis CNE-nian ne’e, marka mos prezensa hosi vise presidente PN, Vicente Guterres, nia mos iha oportunidade halo aprezentasaun konaba Preparasaun Lezislativa ba Eleisaun 2012. Iha tempu hanesan Direktur STAE mos marka prezensa no halo aprezentasaun ho tópiku Aktualizasaun Base de Dados, ho nia sub-tópiku Progresso e Obstaclos.

Antes hahu seminariu iha tempu ne’eba Pe. José António fo mos bensaun ba edifisiu Auditoria foun CNE-nian, ne’ebé maka foin remata nia konstrusaun hosi kompañia Adam Construction.