Ho naran Comissão Nacional de Eleições (CNE) nian, hau hakarak hato’o felisitasaun no saudasaun eleitoral ba ami nia visitor sira tomak, ami nia lia-maksalen ‘sejam-bem-vindo’ ba imi tomak iha CNE nia website ne’e.

Iha tinan 2007, inklui mós durante periodu eleisaun, CNE konsege hatur ninia website http://www.cne.tl. Visitor sira barak, tanto nasional nune’e mós internasional, hetan atendimentu CNE nian, sira bele akompaña lala’ok eleisaun geral iha tinan neba liuhosi website ne’e. Infelizmente, kuaze tinan rua-nia-laran-resin (hosi 2008 to’o inisiu 2011 ne’e), CNE nia website ne’e ausente tiha hosi publiku nia let. Ne’e devidu, puramente, kestaun tékniku/finanseiru. Ami rekoñese frakeza ida ne’e no fiar duni katak situasaun ne’e la favorável ba públiku em geral, no liliu ba ami nia visitor rutinu sira. Relasiona ho ne’e, ho naran CNE nian, hau hakarak agradese mós ba komprensaun tomak mak visitor sira hatudu em relasaun ho auzénsia hosi ami nia website ne’e.

Oras ne’e, ho esforsu no apoiu tekniku nebe mak iha, CNE hatadan an fila hikas iha públiku nia let, iha imi nia let, liuhosi prezensa website ne’e. Ami promete buka halo nafatin esforsu atu oinsa bele asegura prezensa websiste ne’e no oinsa atu rutinamente halo ‘update’ ba website ne’e ho tipu no modelu aprezentasaun informasaun sira nebe, tuir ami nia hare, pertinente no konveniente ba públiku eh ba visitor sira atu hatene. Website ida ne’e aprezenta an ho formatu no estrutura foun, koresponde ho tipu no formatu informasaun mak CNE hakarak oferese ba visitor sira. Ho laran luak, hau hakarak konvida públiku sira atu bele aproveita espasu no biban ne’e hodi planeia fila hikas vizitas rutinas mai ami nia website ne’e. Ami hein katak wensite ne’e bele fo benefisiu ruman, sai nudar foro eh fatin kunsulta ba dúvidas, fatin bukan preenche gap informasaun sira nebe mak iha, no fatin buka atu akompaña lala’ok orgaun eleitoral ida ne’e nian, no fatin atu buka inteira ho aktu eleitoral sira saida deit mak hala’o eh atu hala’o iha tempu oin-mai, tantu iha nivel nasional nune’e mós iha nivel sub-nasional. Ba CNE rasik, aleinde kestaun atu asegura publisidade ho natureza informativo, websiste ne’e manifesta kumprimentu ba instituisaun ida ne’e ninia prinsipiu kona-ba transparénsia no ba ninia ezizénsia atu asegura memória institusional.

Obrigado

DR. Faustino Cardoso Gomes,Msi.
Presidente CNE
President's Blog