CNE liu hosi nia plenaria ordinaria datadu 18-5-2011, desidi Komisáriu na’in 4 ba halo observasaun eleisaun iha Thailandia. Komisáriu sira ne’e maka hanesan: Angelina L. Sarmento, Duarte Tilman, Lucas de Sousa no Manuela L. Pereira.

Misaun observasaun ne’e ho objetivu atu observa eleisaun kona-ba “ House of Representatives” no Eleisaun ba “Constituency”. Ekipa delegasaun CNE-nian faz parte iha misaun observasaun ANFREL ( Asian Network for Free Election). Kona-ba sistema eleisaun, Komisária Angelina ne’ebé maka partisipa iha observasaun ne’e hateten “Sistema eleisaun iha Thailandia-nian, votu ne’e obrigatóriu ba eleitor ne’ebé maka atinji ona tinan 18. No kazu wainhira iha eleitor ne’ebé maka labele vota iha loron eleisaun, nia propriu tenki aprezenta razaun ba Komisaun Eleitoral iha fatin konstituensia refere loron 7 molok tama ba loron eleisaun liu hosi karta eskrita ne’ebé nia bele indika ema ruma reprezenta nia rasik hodi submete ba Komisaun Eleitoral”, dehan komisaria liu hosi ninia relatóriu.

Entretantu Komisáriu Lucas de Sousa ne’ebé maka partisipa mos iha observasaun ne’e hateten katak “Aleinde halo observasaun ba eleisaun iha Thailandia ami mos halo estudu komparativu hodi haree ema-nia esperesia no mos haree ema-nia prosesu eleisaun tomak, atu nune’e hodi kompara liu tan ita-nia sistema eleitoral. Iha ninia observasaun ne’e Komisáriu destaka pontu pozitivu balun maka hanesan pesoal apoiu tekniku ba preparasaun eleisaun hotu-hotu preparadu, aleinde ne’e Komisáriu mos hare katak pontu negativu balun maka observador internasional la iha.