Iha loron 18 fevereiru 2011, Funsiunariu CNE hamutuk na’in 23 ne’ebé maka hetan treinamentu hosi BRIDGE faze daruak, simu sertifikadu. Treinamentu ne’e realize tanba iha akordu entre CNE ho Australia Commission Election, liu hosi nia pontu fokal Augusto Perreira.

Marka prezensa iha fahe sertifikadu ne’e Presidente CNE, Faustino Cardoso Gomes, akompaña hosi Membru Australia Electroral Commision Cate Tompson.

Treinamentu ne’e hala’o ba faze rua; faze dahuluk hala’o iha loron 7 to’o loron 11 fulan Fevereiru, no partisipantes hosi CNE hamutuk na’in 22, tuir mai faze daruak hala’o iha loron 14 to’o 18 fulan fevereiru, partisipantes hosi CNE hamutuk 21.

Presidente CNE expresa ninia sentimentu orgullu ba partisipantes sira, tanba iha komitementu diak hodi hasa’e kuiñesimentu no kapasidade liu hosi treinamentu ne’ebé oferese hosi Australia Electoral Commission(AEC) atrves BRIDGE. “hau orgullu tebes, no hato’o parabens ba imi hotu, mas labele satisfeitu ba liafuan parabens no halo dukur imi, maibé iha nafatin motivasaun as hodi kapasita imi nia-an. Oportunidade ida ne’e sei ajuda CNE oinsa atu jere eleisaun ida ne’ebé maka justu.Demokrasia ne’e la’os karakterizadu fo prezensa partidu politiku bara-barak, maibé eleisaun no liu-liu zere eleisaun ho diak presiza orgaun eleitoral ne’ebé maka iha kapasidade atu jere eleisaun, hodi nune’e bele hamosu kredibilidade iha públiku nia-oin”.

Entretantu iha fatin hanesan, Manuel Gaspar Nu’udar partisipante hosi CNE ba treinamentu ne’e hateten katak “treinamentu ne’e hanesan pasu ida importante tebes hodi hasa’e kualidade servisu nian. No liu hosi treinamentu ne’e ami nu’udar partisipantes ne’ebé mai hosi instituisaun oi-oin bele partilla experensia hamutuk konaba lala’ok eleisaun. No hau rekomenda ba CNE no BRIDGE atu treinamentu hanesan ne’e presiza iha kontinuasaun, liliu funsiunariu CNE maka servisu iha orgaun independente ne’ebé maka nia kna’ar tau matan ba aktus eleitoral hotu.