Comissão Nacional de Eleições (CNE) realiza sorumutu ho Partidu Polítiku, PNTL, Ministériu Públiku no Media sira 28/6/2011 iha salaun apuramentu CNE Caicoli. “Objetivu hosi hala’o sorumutu ida ne’e maka oinsa atu partilla informasaun ba malu, hamosu entendimentu hanesan, buka esplora medidas no mekanismu de koordenasaun, atu nune’e ita la bele soe responsabilidade ba malu. Ida-idak hatene nia kna’ar, atu nune’e la bele hatudu liman ba malu, hodi hateten katak ida ne’e la’os hau nia kompetensia, ida ne’eba ninia kompetensia. Hodi nune’e ita bele avansa ba iha eleisaun 2012 ho serteza kona-ba se mak halo saida, no oinsa, bazeia ba ida-idak nia kna’ar hodi asegura susesu ba eleisaun 2012 mai”, dehan Presidente CNE.

Enkontru ne’e realiza, tanba durante ne’e ita hatene katak PARPOL sira komesa hala’o aktividade konsolidasaun, no media sira mos halo sira-nia kobertura. No dala barak mosu observasaun no kritika tanba atividade refere sai hosi koridor konsolidasaun nian, no tama ba teritóriu kampaña eleitoral. Públiku, inklui deputadu balun hateten tanbasa mak CNE la hola medidas ou regula atividade hanesan ne’e, no iha mos dúvida seluk tan.

Iha fatin, Lei mos la fo kompetensia maka’as ba CNE hasoru preokupasaun sira iha leten. Lei No. 6/2006, Lei No. 7/2006 no Lei No. 3/2009 fo kompetensia ba CNE hodi hola medidas, mas so deit iha periodu kampaña eleitoral, ne’ebé nia durasaun depende ba Lei eleisaun sira ne’e ida-idak. Ba eleisaun Parlamentar, purezemplu nia durasaun loron tolu-nulu (30); ba eleisaun presidensial nian durasaun loron sanulu-resin-lima (15); ba eleisaun lideransa komunitaria nian durasaun loron hitu (7). Atividade kampanha eleitoral sira ne’e tenki termina molok tama ba loron votasaun.

Kona-ba ne’e, lei rasik la defini kompetensia CNE fora hosi periodu kampaña eleitoral tantu antes no depois.

Iha fatin hanesan Sr. Antonino Bianco reprezentante hosi partidu FRETILIN hateten katak “Durante ne’e ema barak preokupa kona-ba FRETILIN-nia atividade, ne’e tanba servisu hosi uma kain to’o iha nivel nasional. Hahu kedas 2007 depois de krizi ami atu kampaña de paz, CNE la foti problema. Depois mai fali marsa ba vitória, CNE mos la foti kazu, no ema la preokupa. Tuir mai ami reazustamentu ba estrutura hosi Aldeia to’o Distritu ema la kestiona. Maibe kuandu ami halo konsolidasaun ema barak kestiona, maibe ami hakarak hateten katak ida ne’e atividade PARPOL-nian, no ami hala’o atividade-sira ne’e hotu ho prinsipíu Paz Estabilidade no Dezenvolvimentu.