Objetivu bo’ot ida hosi vizita Presidente CNE ba iha Estadus Unidus, maka halo observasaun ba sistema federal norte-amerikanu. Tanbá eleisaun sira ne’e hala’o interkala no remata iha loron 2 fulan Novembru, DR. Faustino Cardoso hetan oportunidade hodi analiza programa guvernu lokal nian, relasaun federasaun no estadual no papel Stadu iha eleisaun sira.

Vizita ne’e hala’o durante semana tolu, no Presidente CNE observa estadu federal lima mak hanesan; Washington, Maryland, Wisconsin, California no Texas.

“Vizita ne’e intresante tanbá sistema eleitoral ne’ebé maka totalmente la-hanesan no komplikadu”, dehan DR. Faustino. “Kada estadu iha poder rasik hodi organiza eleisaun no estabelese regra eleitoral sira”, subliña Presidente.Maske sistema ne’e komplikadu, “Prosesu ne’e to’o ikus la’o hodiak, organizadu, tanbá usa teknolojia né’ebé (votu elektróniku )”, tenik DR. Faustino.

Liu hosi nia váriu observasaun, DR. Faustino destaka espíritu voluntarismu hosi ofisial eleitoral sira no komportamentu eleitor sira nian. “Ofisial eleitoral sira servisu voluntáriu no hili iha tempu eleisaun, sira koordena no organiza prosesu hotu”, Presidente esplika.

Antes hakat ba eleisaun “eleitor sira mos iha konsensia ne’ebé as tebes, no sira ba vota la-haree ba partidu mas ba programa ne’ebé maka aprezenta hosi partidu sira”hatutan presidente CNE, interliga ba realidade katak eleitor timor sira mos komesa kritíku tebes: “promesa sira maka la realiza bele afekta ba komportamentu eleitor sira”.

Aspektu sira seluk maka observa hosi DR. Faustino Cardoso.katak durasaun tempu ne’ebé barak iha UEA ba kampaña, no kestaun finansimentu ba partidu politíku sira “la-iha limitasaun ba duador sira atu finansia kampaña” hateten Presidente CNE ba dala-ikus.