Objetivu hosi sorumutu ho tópiku Atividade Partidu Polítiku no Kampaña Eleitoral ne’e, maka oinsa atu hetan entendimentu komun ida tuir prinsípiu Estadu de direito, liga ho CNE-nia kompetensia no atividade partidu polítika sira-nian, nune’e bele hatan ba ezizensia no kritíka hosi públiku ligadu ho kompetensia CNE-nian iha komunikasaun sosial.

Marka prezensa iha sorumutu ne’e komisáriu na’in 13 no Xefi bankada ou nia reprezentante partidu 6 (FRETILIN, CNRT, PD, PSD, ASDT no PUN). Em jeral sorumutu la’o ho diak, maske dala balun partidu sira dun malu katak ida halo ona kampaña eleitoral, ida seluk dehan nia halo konsolidasaun la’os kampaña eleitoral, maibé ikus mai maioria hosi deputadu no komisáriu rekoñese katak iha duni frakeza hosi Lei no presiza hadia Lei hodi regula atividade PARPOL sira-nian.

“Durante ne’e ita hatene katak parpol sira komesa halo atividade konsolidasaun, no media sira mos halo sira-nia kobertura. Dala balun ita rona alegasaun katak, atividade ne’ebé refere sai ona hosi atividade normal parpol-nian, no tama ona iha teritóriu kampaña eleitoral-nian. Balun halo inkursaun ona tama iha ne’ebá, depois balun kritíka tanbasá CNE lahola medida ka laregula aktividade ne’e. Hosi parte CNE mos rekuñese katak, Lei ne’ebé fo kompetensia ba CNE mos limitadu. Aleinde ne’e deputadu balun mos hateten katak lolos CNE maka tenki regula, tanbá Lei fó ona kompetensia. Iha Lei nú. 6/2006, Lei nú. 7/2006 no Lei nú. 3/2009, fó duni kompeténsia ba CNE, maibe só iha periodu kampaña eleitoral. No Lei sira ne’e ladefini kompeténsia CNE-nian fora hosi periodu kampaña eleitoral tantu antes no depois”. Dehan Presidente CNE iha uma fukun PN, 28/6/2011.

Iha sorin seluk Presidente Parlamentu Nasional ne’ebé maka marka prezensa iha sorumutu ne’e nu’udar Presidenti Partidu PD, nia rekuñese katak iha duni frakeza hosi Lei hodi regula atividade Parpol “Iha parte PD hau sempre aviza ba membru sira katak bainhira halo konsolidasaun iha de’it fatin, maibe dala ruma sira sai tiha metru 100 hodi hasoru hau ho delegasaun sira. Maibe iha prisipiu hau sempre hateten maske iha Lei ne’e sei iha frekeza, ita labele aproveita frakeza hosi Lei ne’e hodi kontra fali Lei seluk ne’ebé seidauk esplísita atu ko’alia”, dehan Presidente PD.