“Objetivu hosi realiza enkontru ne’e maka atu fasilita forum ida, atu nune’e partidu polítiku sira bele kuñese malu, liu-liu partidu sira maka foun. Aleinde ne’e bele fahe ba malu dúvidas sira maka durante ne’e dezenvolve iha Parpol sira-nia let, liu-liu kona-ba prosesu aprezentasaun kandidatura ba eleisaun Presidente no Parlamentar, no kona-ba sondazen ne’ebé maka media STL halo”, dehan Presidente CNE ba media sira, iha sede CNE Kintal Bo’ot, 14/9/2011

“Kona-ba aprezentasaun kandidaturas depois do dia da markasaun do dia da eleisaun. Tuir Konstituisaun Presidente deit maka iha kompetensia eksklusiva hodi fixa loron refere, por ezemplu ba eleisaun Presidensial, loron 60 molok tama ba loron eleisaun, no ba eleisaun Parlamentar loron 80 molok tama ba loron eleisaun”, tenik Presidente CNE

Komisariu CNE, José Agostinho Belo ne’ebé kaer asuntu Partidu polítiku, hateten katak “Enkontru ho Partidu polítiku sira ne’e la’os buat foun, maibe realiza bebeik ona tanba kna’ar bo’ot ida CNE-nian maka halo komunikasaun permanente ho Parpol sira. No liu hosi enkontru ne’e bele fo sai ba sira kona-ba planu CNE-nian maka trasa tiha ona, rutina no kontinua liu-liu relasiona ho atividade debate públiku mak sei realiza iha tinan ne’e nia rohan.

Iha parte seluk, Partidu KHUNTO no PNT husu ba CNE atu partilla informasaun liu hosi edukasaun sívika ba sira.

Marka prezensa iha enkontru ne’e, Partidu sira maka hetan asentu iha Parlamentu, Sira ne’ebé maka la hetan asentu no balun foin rezistu iha Tribunal Rekursu.