Kordenador STAE Distritu Aileu(karuk), Komisaria Teresinha, Komisariu José halo introdusaun, Komisária Dulce no Xefi suku Koto Lau. Foto: Deolindo Ramos

Tuir planu ba tinan 2011 CNE sei halo edukasaun Sívika ho nia frekuensia dala tolu ba kada sub-distritu. Maibe mehi refere labele realiza tanbá orsamentu maka prevé ba CNE la-sufiesente. Nune’e bazeia ba Plenaria ordinaria datadu 16-03-2011, deside katak sei halo edukasaun sivika dala ida iha kada sub-distritu.

Relasiona ho desizaun plenaaria ne’e, iha loron 18-03-2011 komisariu José nu’udar responsabel ba Distritu Aileu, hahú halo edukasaun sívika iha sub-distritu Laulara ho tema Promove Partisipasaun Popular ba Rezistu Eleitoral Hodi Hakbesik ba Eleisaun 2012. Iha oportunidade ne’e oradoor sira maka halo apresentasaun maka hanesan: Komisaria Dulce ko’alia kona-ba “Papel CNE iha Eleisaun”, Komisaria Teresinha ko’alia kona-ba “Prinsipiu Demokrasía Liu Hosi Sistema Eleitoral”

“Objetivu hala’o edukasaun sívika ne’e maka fo informasaun adekuadu ba populasaun tomak, liu-liu eleitores sira iha nivel komunidade, no esplika ba sira kona-ba oinsa sira bele fo sira-nia direitu no dever iha eleisaun”. dehan komisariu José.

Kona-ba partisipantes komisariu hateten katak “tanba suku rua deit mak tuir ne’ebé hau haree katak total partisipantes purvolta 80 to’o 100, no ida ne’e hatudu katak partisipasaun masimu duni ho razaun suku dok malu depois tempu udan. No hau senti orgullu tebes tanba partisipantes sira ho hakmatek no partisipa to’o aktividade ne’e remata, ida ne’e hatudu katak sira iha duni interese atu rona. Edukasaun sívika tuir mai sei realiza depois de Paskua, iha Suku Tohu-Meta”, tenik Komisariu ne’ebé maka kaer kna’ar hanesan koordenador sub komisaun Partidu Politiku.

Iha fatin hanesan Administrador Sub-Distritu Laulara, Abilio Alves hateten katak sebele edukasaun sivika alende fo mai iha populasaun iha baze fo mos ba lideransa partidu politiku sira“tuir hau-nia haree eventu hanesan ne’e maka ami hein duni, tanba liu hosi meius hanesan ne’e ami bele simu informasaun maka klaru tebes kona-ba aktu eleitoral hotu. No hau rekomenda ba CNE atu fo mos edukasaun sívika ba lideransa partidu politiku sira, tanba dala ruma sira maka kria konfuzaun iha povu-nia let”, dehan Abilio.