Atu hasa’e kuiñesementu funsiunariu sira-nian kona-ba prosesu eleisaun, CNE liu hosi plenaria estabelese akordu ho Australia Electoral Commission(AEC), atraves ninia pontu fokal Sr. Augustu Pereira, hodi fo treinamentu ba funsiunariu no pontu fokal CNE. Atu kontinua trinamentu ne’ebé maka halo tiha ona iha fulan fevereiru tinan ne’e, iha loron 1/3, CNE liu hosi ninia presidente halo abertura ba treinamentu kona-ba Treinu Fasilitador. Treinamentu refere sei realiza iha Com-Lautem, hahu hosi loron 4-15 Abril tinan ne’e.Partisipantes ba treinamentu ne’e;hosi CNE na’in 16 no organizasaun sira seluk na’in 4.

“ohin CNE hahu loke faze ida kona-ba treinamentu ne’ebé sei fo liu ba pontu fokal sira atu sai nu’udar fasilitador ba edukasaun sívika nian. Treinamentu ne’e realiza tanba servisu hamutuk ho AEC no apoiu hosi AUSAID. Objetivu hosi treinamentu ne’e maka atu bele fo matenek no kapasidade ba pontu fokal CNE-nian, hodi aban bain-rua bele sai fasilitador iha area edukasaun sívika tanba ita hatene katak edukasaun sívika sai hanesan kna’ar importante ida ba CNE atu haklaken no habelar liu tan kuñesementu kona-ba lalaok eleisaun ninian iha nivel komunidade. Durante ne’e ami Komisariu sira maka halo edukasaun sívika mas agora to’o ona tempu atu hatur prinsípiu sustentabilidade hodi involve aktivamente pesoal sekretáriadu hosi CNE-nian, atu involve direitamente iha prosesu edukasaun sívika”, dehan Presidenti CNE iha salaun auditória CNE Kaikoli 1/3.

“susesu ba treinamentu ne’e depende ba partisipasaun ativu partisipantes sira-nian, liu hosi kontribuisaun matenek no esperensia maka sira iha. Treinamentu ida ne’e la’os atu fo deit posibilidade ba partisipantes sira atu hetan matenek no esperensia foun, maibe atu fasilita hari’i mos rede servisu profesional nian. Staf sira mak iha talenta nokomitmentu diak bele aplika stilu aprende BRIDGE-nian iha sira-nia servisu fatin loro-loron, no preparasaun ba eleisaun sira mak atu mai iha 2012, no eleisaun sira seluk ne’ebé maka sei mai iha Timor-Leste.