Lei inan Timor-Leste, Konstituisaun RDTL, artigu 65 pontu 3, hatur prinsípiu sira ba eleisaun nian, hanesan liberdade ba propaganda eleitoral, igualdade oportunidade no tratamentu ba kandidaturas oin-oin, imparsialidade hosi entidade públika sira hasoru kandidatu sira, transparensia no fiskalizasaun kona – ba kontas eleitorais. Lei Nú. 5/2006 kona-ba orgaun eleitoral nian, estipula kompetensia CNE nian, entre outros, atu promove esklaresimentu ne’ebé objetivu ba sidadaun sira kona-ba aktu eleitoral liu hosi meio komunikasaun sosial sira.

Atu hala’o tuir prinsipiu sira iha leten, hahu kedas hosi ninia prezensa, hafoin konstituida iha loron 15 fulan – Janeiru 2007 CNE dezenvolve no hala’o pólitika hirak ida kona-ba komunikasaun no relasaun ho media nian. Pólitika komunikasaun CNE nian durante sirkulu eleitoral 2007 iha objetivu principal tolu (3) hanesan: (1) oinsa buka sosializa CNE ninian prezensa no kompetensia tomak ba públiku; (2) oinsa atu bele hatur no hakbi’it diak liu tan imazen institusional CNE nian pozitivamente iha públika nia le’et; (3) oinsa atu bele públika sai ba públiku ho efikasia no objetivu (imparsial) informasaun kona-ba lala’ok eleisaun tomak inklui mos iha ne’e informasaun kona-ba kandidatu sira ba eleisaun presidensial no partidu no koligasaun partidaria sira mak konkore ba eleisaun parlamentar.

Nudar instituisaun ida mak sei foun, CNE halo esforsu oin-sa atu sosializa ninia prezensa ba publiku, tantu iha nivel nasional no mos iha nivel sub-nasional-distritu sira, to’o iha suku no aldeia sira, atu nune’e sira bele hatene diak liu CNE nudar orgaun eleitoral independente ida ne’ebé sei tau matan ba prosesu eleisaun, prontu atu rona, akomoda no prosesa sira nia lamentasaun ka reklamasaun, tuir kbit no dalan legal mak hatur iha lei sira kona-ba eleisaun nian, no iha tempu hanesan fo mos asesu ba sira atu hetan informasaun tomak kona - ba eleisaun nian.

Atu alkansa objetivu maka temi iha leten, ho esforsu no apoiu tekniku mak iha, CNE hatadan-an iha públiku-nia let liu hosi prezensa website http://www.cne.tl. Ami promete buka halo nafatin esforsu atu oinsa bele asigura prezensa website ne’e no oinsa atu rutinamente halo aktualizasaun ba website refere ho tipu no modelu aprezentasaun informasaun sira ne’ebé tuir ami nia haree, pertinente no konveniente ba públiku eh ba visitor sira atu hatene.